खोटाङमा पहिलोपल्ट दमकल सेवा सुरु (फोटो फिचर)

जेठ–२३, जिल्लामा पहिलो पटक दमकल सेवा सञ्चालनमा आएको छ । दिक्तेल नगरपालिकाले जिल्ला भित्र्याएको दमकल शनिबार औपचारिक रुपमा उद्घाटन गरेर सेवा सुरु गरेको हो । 

नगरपालिकाले दमकलसँगै फोहोर उठाउने ट्रिपर समेत सञ्चालनमा ल्याएको छ । टेण्डरमार्फत जिल्ला भित्र्याइएको दमकल र ट्रिपर प्रमुख जिल्ला अधिकारी गोविन्द सापकोटाले शनिबार रिबन काटेर उद्घाटन गर्नुभयो । 

नेपाल सरकारको ६० लाख र नगरपालिकाको आठ लाख ५० हजारमा दमकल र सरकारको २६ लाख पाँच हजारमा ट्रिपर खरिद गरिएको नगरपालिकाका कार्यकारी अधिकृत नारायण ढकालले बताउनुभयो । पछिल्लो समय घोषणा गरिएका ७२ नगरपालिकामध्ये दिक्तेल नगरपालिकामा सबैभन्दा पहिले दमकल तथा ट्रिपर भित्र्याइएको ढकालको दावी छ । 

सरकारबाट दमकल खरिदका लागि ६० लाख तथा ट्रिपर खरिदका लागि ३० लाख रुपैयाँ नगरपालिकामा आएको थियो । प्राप्त ट्रिपरमार्फत केहीदिनमै नगरभित्रको फोहोर हटाउन सुरु गरिने ढकालले जानकारी दिनुभयो ।