खोटाङ पुस–१, खोटाङमा ट्याक्टर दुर्घटना हुँदा सह–चालकको मृत्यु भएको छ । खोटेहाङ गाउँपालिका–६ ईन्द्रेणीपोखरीको मेर्लामा सु–प–प्र–०१–००२ त ४२९८ नम्बरको ट्याक्टर दुर्घटना हुँदा उदयपुरको लिम्चुङबुङ गाउँपालिका–४ बलम्ताका १८ वर्षीय किरण राईको घटनास्थलमै मृत्यु भएको हो ।
सप्तरीको फत्तेपुरबाट धान लिएर ईन्द्रेणीपोखरीको रोक्सिमभञ्ज्याङतर्फ जाँदै गरेको ट्याक्टर पल्टँदा वलम्ताकै १९ वर्षीय ट्याक्टर चालक तुजन राई गम्भिर घाईँते वनेका छन् । घाईते ट्याक्टर चालकको कम्मरमुनिको भाग नचल्ने अवस्थामा उद्धार गरिएको जिल्ला प्रहरी कार्यालय खोटाङले जनाएको छ । चालकलाई उपचारका जिल्ला अस्पताल उदयपुर लगिएको जनाईएको छ ।
सिमपानी–रोक्सिङ भञ्ज्याङ सडक खण्डमा अनियन्त्रित भएको ट्याक्टर सडकबाट पल्टिएर करिब तीन मिटर तल खसेको ईन्द्रेणीपोखरीका वडाध्यक्ष देबेन्द्र राईले बताउनुभयो । रोक्सिङभञ्ज्याङ पुग्न लाग्दा करिब बिहान ८ बजेर २५ मिनेटमा ट्याक्टर दुर्घटना भएको हो ।
घटनास्थलमा ईलाका प्रहरी कार्यालय खोटाङबजार र प्रहरीचौकी सिमपानीबाट प्रहरी पुगेका थिए ।
रोक्सिङ भञ्ज्याङ पुग्नुभन्दा करिब आधा घण्टा अगाडि ट्याक्टर दुर्घटनामा परेको हो ।।