सुङ्देल/ केपीलासगढी गाउँपालिका वडा नम्बर ७ सुङ्देलमा तीनसय बर्ष पुरानो साकेला थान संरक्षण शुरु भएको छ । किरात कोयी÷कोयु राई सोदेल किम खोटाङको व्यवस्थापनमा रथमा रमालु साकेल थान संरक्षण शुरु भएको हो ।
सुङ्देलमा जन्मभई हाल बेलायत बस्दै आएका सुङ्देल सेवा समाजका किर्त बहादुर राई, आर एस एम युवराज राई, अगमसिँ राई लगायतको पहलमा प्राप्त आर्थिक सहयोगबाट साकेला थानको घेराबार शुरु गरिएको छ । बेलायतमा बस्ने अन्य सहयोगीहरुसँग हातेमालो गर्दै बेलायत (युके) बाट तीनलाख ५ हजार रुपैँया आर्थिक सहयोग प्राप्त भएको सोदेल किमका जिल्ला सचिव ललिति चन्द्र राईले जानकारी दिएका छन् । सो रकमले साकेला थानको वरिपरि घेराबार पर्खाल निर्माणधिन रहेको राईले जनाएका छन् ।
यस्तै हाल हङकङ बस्दै आएका हितबहादुर राई, प्रकाश राई (सप्तेश्वर) लगायतका सहयोगिहरुबाट प्राप्त तीनलाख ५५ हजार रुपैयाको लागतमा संयुक्त चुलाघर (चारीकिम) तथा शौचालय निर्माण हुने राईले जानकारी दिएका छन् । साकेला थान परिसर भित्र बन्ने उक्त संरचना निर्माणपछि साकेला मान्न आउने पाहुनाहरुका लागि सुविधा पुग्ने सोदेल किमले जनाएको छ ।
तीनसय बर्ष पुरानो साकेलाथानको उत्पति र विकासको बारेमा अध्ययन गरिरहका सोदेल किम खोटाङका सचिव राईका अनुसार थानको प्रवेशद्धार निर्माण गर्न स्थानीय विमल सिङ राईले ५० हजार रुपैया चन्दा सहयोग गरेका छन् । बैसाखे पुर्णिमाको पञ्चमी तिथिमा पुजा आजा गरिने साकेलामा गाउँ गाउँबाट भाकल फुकाउन पुजामा आउने गर्दछन् ।