खोटाङ फागुन–४, खोटाङस्थित साकेला गाउँपालिकाले हाल सम्म ९५ प्रतिशत योजना सम्झौताको काम सम्पन्न गरेको छ । आर्थिक वर्ष ०७६÷०७७ मा सञ्चालन हुने भौतिक पूर्वाधार अन्तर्गत सञ्चालन हुने ९० योजनाहरुमध्ये पाँच वटा योजनाको हालसम्म सम्झौता हुन सकेको छैन ।

उपभोक्ता समिति विवाद, जग्गा समस्या लगायतका कारण योजना सम्झौतामा कठिनाई भएको भौतिक पूर्वाधार तथा योजना शाखाका प्रमुख सन्तोषकुमार राईले जानकारी दिनुभयो । २५ लाख रुपैयाँमा सञ्चालन हुने वडा नम्बर ४ स्थित नौलाखर्क–हुपापु–आहाले–मानेगाउँ–छाँगेखोला–धप्लिुङछाँगा सडक उपभोक्ता समिति गठन प्रक्रियामा विवाद हुँदा अहिलेसम्म पनि सम्झौता हुन सकेको छैन । यस विषयमा पालिकाकाको तर्फबाट पटक पटक विवाद समाधान गर्ने प्रयास गरिएको भए पनि विवाद सुल्झन सकेको छैन ।

त्यस्तै पर्याप्त जग्गाको अभाव भएपछि वडा नम्बर १ स्थित बाँझे फँलाटे फुटवल खेल मैदानको पनि योजना सम्झौता हुन सकेको छैन । उक्त योजनाको लागि यस आर्थिक वर्षमा १० लाख रुपैया बजेट विनियोजन गरिएको छ । त्यस्तै सिमा जग्गा एकिन नहुँदा ३ नम्बर वडा कार्यालयको घेराबार र मर्मत कार्यको पनि योजना सम्झौता हुन सकेको छैन । ४ लाख २५ हजार रुपैया बजेट विनियोजन भएको उक्त योजना जग्गाको स्पष्ट साँध छुट्टिएपछि मात्र अघि बढ्नेछ ।

यता, जग्गा उपलब्ध नभएपछि २ लाख ५० हजार रुपैया विनियोजन भएको बरडाँडा–छितुवा–तावाखोला सडकको पनि योजना सम्झौता भएको छैन भने मुख्य पदाधिकारी बाहिर गएपछि ४ लाख ५० हजार रुपैया विनियोजन गरिएको पिचाकु मुहान हुँदै ४ नं. वडा कार्यालय सम्मको खानेपानी योजनाको काम सम्झौता हुन सकेको छैन । सम्झौता हुन बाँकी योजनाहरुलाई तत्काल सम्झौता गराई काम सम्पन्न गराउन पालिकाको तर्फबाट लागि परिरहेको योजना शाखा प्रमुख राईको भनाई छ ।

यस वर्ष सम्झौता भएका कतिपय योजनाहरु सम्पन्न हुने क्रममा छन् भने १२ वटा योजनाहरुले काम सम्पन्न गरी फरफारक गराईसकेका छन् । फरफारक भईसकेका योजनाहरुमध्ये ४ नम्बर वडा कार्यालयको भवन निर्माण, २ नम्बर वडा अन्तर्गत मिन बहादुर डाँडा– जन्तरे आहाल सडक, वासिष्ट गोत्री देवालय वडा नम्बर ४, साकेला थान जोड्ने सडक ट्रयाक वडा नम्बर ५, जाल्पादेवी प्रवद्र्धन लामदुवाली वडा नम्बर २, ढाँडे–बोपुङ सडक वडा नम्बर ३, काउलेडाँडा–ओख्लीडाँडा–बाहुनडाँडा–वैशाखे सडक वडा नं. २ रहेका छन् ।

त्यस्तै, स्कुलडाँडा–गुरुङगाउँ सडक वडा नम्बर २, सुर्के समाज सुधार पानी पोखरी वडा नम्बर २, विसाउना खानेपाली मुहान संरक्षण वडा नम्बर २, स्वास्थ्य चौकी बाट पुछारटोल सडक निर्माण वडा नम्बर ३ र साकेलाथान तारघेराबारा वडा नम्बर ५ का योजना पनि फरफारक भईसकेका छन् ।

यता, सफ्टवेयरका काम अन्तर्गत १३ वटा योजनाको सम्झौता गर्न बाँकी छ भने शिक्षा तर्फको शशर्त बजेट अन्तर्गत ११ वटा योजनामध्ये १ वटा योजना सम्झौता गर्न बाँकी छ ।



Loading Facebook Comments ...

LEAVE A REPLY

Please enter your comment!
Please enter your name here