प्रतिनिधिको विषयमा शिक्षकहरुबीच नै विवाद चर्कियो

खोटाङ, ८ मंसिर । व्यवस्थापन समितिमा पठाउने शिक्षक प्रतिनिधिको विषयलाई लिएर खोटाङको दुर्छिम माबिका शिक्षकबीचमै विवाद चर्किएको छ । नयाँ व्यवस्थापन समिति गठनकालागि शिक्षक प्रतिनिधि पठाउने बिषयमा स्टाफबीचमा विवाद चर्किएको हो । आफु अनूकुलको व्यवस्थापन समिति अध्यक्ष बनाउने खेलमा विद्यालयका शिक्षक नै दुई धारमा बिभाजित बनेर लागिपरेका छन् ।

 गत आईतबारको स्टाफ मिटिङले शिक्षक शैलेन्द्रकुमार राईलाई व्यवस्थापन समितिमा प्रतिनिधि पठाउने निर्णय गरिएको दोश्रो दिन १५ शिक्षकमध्ये ८ शिक्षक बिरोधमा ‘पेनडाउन’मा उत्रिएका छन्, भने ७ शिक्षक शैलेन्द्रकै पक्षमा उभिएका छन् । व्यवस्थापन समितिको नयाँ अध्यक्ष चयनकालागि शिक्षक प्रतिनिधिको प्रमुख हात रहने स्थिति बनेपछि शिक्षकबीचमै गणितीय खेल सुरु भएको हो । पूरानो भवनको फरफारक नभएको र नयाँ भवनकालागि आएको ४८ लाख बजेटमा हात हाल्नकालागि समेत व्यवस्थापन समिति गठनमा राजनितिकरण भएको नाम उल्लेख नगर्ने शर्तमा एक अभिभाबकले बताए ।

 जिल्लास्थित दश दलका प्रमुख नेताले शिक्षकलाई राजनैतिक गतिबिधिमा प्रयोग नगर्ने प्रतिबद्धता जनाएको हप्ता दिन नबित्दै दुर्छिम माबिका शिक्षकभित्र राजनिति घुसेको हो । अहिले शिक्षक शिक्षणमाभन्दा पनि नयाँ व्यवस्थापन समितिको अध्यक्ष आफु अनूकुलको बनाउने दाउमा लागेका छन् ।

शिक्षा ऐन आठौँ संशोधन ऐन २०७३ अनुशार मंसिर ४ गते दुर्छिममा गरिएको निर्वाचनबाट व्यवस्थापन समितिकालागि कांग्रेस निकटका शम्भु राई र पुष्प मल्ल ठकुरी तथा स्वतन्त्र टिमको नेतृत्व गरेको दुर्छिम मावि सुधार मञ्चका रमेश राई र गमिता राई अभिभाबक प्रतिनिधिमा निर्वाचित भएका छन् । निर्वाचित अभिभाबक शम्भु राई र पुष्प मल्ल ठकुरीको पक्षमा शिक्षक बिष्णुबहादुर राउत, केदारप्रसाद शाह, मेजर राई, किरनचन्द्र कार्की, एकबहादुर बुढाथोकी, दिपबहादुर राई र एकनाथ राउत उभिएका छन् भने सुधार मञ्चका रमेश राई र गमिता राईको पक्षमा प्रअ बिष्णु राई, खम्बराज राई, हम्मर राई, बगम राई, नबिन चामलीङ, बिमला राई र शैलेन्द्रकुमार राई देखिएका छन् । स्टाफ मिटिङबाट छानिएका शिक्षक प्रतिनिधि शैलेन्द्रकुमारले व्यवस्थापन समितिको निर्वाचनमा रमेश राई र गमिता राईलाई समर्थन गर्ने भएकाले कांग्रेसका स्थानीय नेताको डिजाईनमा अर्को शिक्षक प्रतिनिधि छान्ने खेलमा ८ शिक्षक लागेको श्रोतले बताएको छ । अर्कातर्फ एउटै टिम बनाए पनि निर्वाचनमा प्रतिनिधि छिराउन नसकेका एमाले र नेकपा माओबादी केन्द्रका कार्यकर्ता तथा उनीहरुनिकट शिक्षक जुनसुकै हालतमा शैलेन्द्रलाई नै प्रतिनिधि कायम गरेर रमेश र गमितामध्ये एकलाई अध्यक्ष बनाउने कसरतमा छन् । प्रअ बिष्णु राई समेत सुधार मञ्चकैपक्षमा लाग्ने संकेत पाएपछि डिजाईनमा ८ शिक्षक स्टाफ मिटिङको निर्णयलाई उल्टाएर आफु अनुकुलको अर्को शिक्षक प्रतिनिधि पठाउन कस्सिएको श्रोतको भनाई छ । ‘शैलेन्द्रलाई नै प्रतिनिधि पठाइए एकातिरको बहुमत हुने देखियो,’ एक अभिभाबकले भने, ‘त्यही भएर त्यसलाई भत्काउने खेल शिक्षकमार्फत भएको हो ।’

डिजाइन अनुशार ८ शिक्षकले शैलेन्द्रलाई प्रतिनिधि पठाउन गरिएको निर्णयमा सहमती जनाउँदै आईतबार शिक्षक प्रतिनिधिकारुपमा बिष्णुबहादुर राउतलाई समर्थन गरिएको लिखित व्यहोरा प्रअलाई बुझाएका थिए । आईतबार ४ बजेभित्रमै छलफल गर्न र समस्या हल गर्नकालागि राखिएको मागलाई बेवास्ता गरेको भन्दै तिनै असन्तुष्ट शिक्षक सोमबारदेखि पेनडाउनमा उत्रिएका हुन् । यद्यपी, जिल्ला शिक्षा अधिकारी ज्ञानमणि नेपालले ‘क्लास नगरे कारबाही गर्ने’ चेतावनी दिएपछि उनीहरुले बुधबार नै पेनडाउन फिर्ता लिएका छन् ।

प्रअले सबै शिक्षक उपस्थित नभएको बेलामा स्टाफ मिटिङ बोलाएर निर्णय लादेकाले पेनडाउनमा उत्रनु परेको असन्तुष्ट शिक्षक बिष्णुबहादुर राउतले बताए । श्रोतव्यक्ती पेशल आचार्यले सबै शिक्षकलाई खबर नगरी शिक्षक प्रतिनिधि छान्ने निर्णय गराएकाले बिवाद आएको बताए । प्रअ बिष्णु राईले भने तीन जना बाहेक अन्य स्टाफकै छलफलबाट शिक्षक प्रतिनिधि छान्ने निर्णय गरिएको बताए । स्टाफ मिटिङमा दिपबहादुर राई, मेजर राई र एकबहादुर बुढाथोकी अनुपस्थित थिए । श्रोतका अनुशार उनीहरु बिदा नै स्वीकृत नगरी विद्यालयमा अनुपस्थित थिए । पेनडाउनमा उत्रिएका शिक्षकमध्ये दिपबहादुर स्टाफ कुटपिट मुद्धामा तारेख खेपीरहेका र मेजर परिक्षण कालमै छन् । व्यवस्थापन समितिको नेतृत्व पूरानै व्यक्तीले लिए विद्यालयको शैक्षिक गुणस्तर उस्तै रहने भन्दै यसपल्ट स्वतन्त्र टिमले दुर्छिम मावि सुधार मञ्चका नामबाट उम्मेदवारी दिएका थिए । शिक्षाको संयोजनमा कार्तिक २९ गतेको सर्वदलीय बैठकले खस्कँदो शैक्षिक स्तर उकास्नकालागि शिक्षकलाई राजनितीबाट टाढा राख्ने सहमती गरेको थियो ।